पाऊस.
पावसाळा आला की
धस्स होतंय छातीत....
आता झोपडी शाकारावी लागणार
गोठ्यावर मेणकापड पाहिजे
दोन दिवसाचा खाडा कामाचा
शिवाय खर्च आला शे पाचशेचा
पावसाळा.....
एकदा सुरु झाला की
थांबायचं नाव नाही
मग वापसा होईपर्यंत
मजुरीही नाही...
पोटाच काय?
पाऊस.....
आडवा तिडवा
पडायला लागला की
सुमारच नसतो त्याला
कौलातून धारा
जमिनीवर तलाव
झोपायचे वांदे!
खायाचेही वांदे!
पाऊस.....
एकदा सुरू झाला की
सगळ कसं हिरवंगार
पण घरात चिकचिक
बाहेर चिकचिक
होते चिडचिड
हाल हाल
जगण्याचे!
...प्रल्हाद दुधाळ.
कोणत्याही टिप्पण्या नाहीत:
टिप्पणी पोस्ट करा