किंमत

किंमत .
भारत माझा देश आहे
सारे भारतीय माझे बांधव आहेत
पुस्तकातली प्रतिज्ञा पुस्तकातच
देशाबाहेर गेल्यावर दिसे भारत महान
देशात मात्र भिन्न झेंड्यांसाठी मानापमान
प्रांत भाषा धर्म जात पोटजात इत्यादि
वितंडवादाला पुरतात कारणे साधी साधी
माणुसकीचे गोडवे फक्त तोंडी लावायला
ओळखत नाही मात्र सख्ख्या शेजार्याला
छत्रपती शिवाजी फुले शाहू आंबेडकर
शुध्द स्वार्थासाठी या नावांचा वापर
अर्थ स्वातंत्र्याचा अनिर्बंध स्वैराचार
भ्रष्टाचार आता झालाय शिष्टाचार
सत्ता संपतीसाठी लोकशाही वेठीला
शरण आम्ही जागतिकिकरणाच्या लाटेला
देश आहे स्वतंत्र आर्थिक गुलामीची किंमत देवून
स्वदेशी नी स्वावलंबन लाटेत गेले वाहून...
      .....प्रल्हाद दुधाळ.