बेगडी शुभेच्छा...

बेगडी शुभेच्छा....
( हलकेच घ्या)

शुभेच्छा दिल्या वा घेतल्या म्हणून
 नशीब मुळीच बदलत नाही
दिर्घायुष्याच्या दिल्या आशिर्वादाने
अमरत्वही कुणा लाभत नाही

शुभेच्छांचे शब्द जरी हे ओठात
पोटात वेगळच असू शकतं
आजकाल गोड गोड बोलण्यात
मनात जहरही असू शकतं

गुडी गुडीच्या नात्यांना जपायला
शुभेच्छांचं इंधनच येतं कामाला
बेगडी जमान्यात आजकालच्या
महत्व आहे फक्त ते दिखाव्याला

आभासी दुनियेत या आधुनिक
शुभेच्छेसाठीचे निमित्त शोधावे
जिभेवर करून साखरपेरणी
अभिष्टचिंतन करत राहावे

 सद्भावना खरचं असल्या तर
 अव्यक्तपणेही पोहचतातच
जाणीवा त्या समृद्ध असल्या तर
शुभेच्छा सन्मित्रा समजतातच

कळले जरी वळेल असे नाही
जगासारखे वागावेच लागते
मनात असो वा नसो ते तुमच्या
हार्दिक शुभेच्छा म्हणावे लागते
        ..... प्रल्हाद दुधाळ.